BuzzerBeater Forums

GALIZA CUP XXII

Nova tempada, nova edición da Galiza Cup. Unha tempada máis a nosa raíña volve para demostrar que segue sendo o mellor torneo do mundo BB. Nin ACBB, nin Copa de España, nin a Masters B3, o trofeo que todo equipo quere acadar fala galego e viste un vestido branco cunha franxa diagonal azul. Tes o que hai que ter para se-lo novo campión?

E os que tamén voltan son os lacazáns de Litur, Miki e Sozap, ós que lles debo tempada tras tempada o meu agradecemento por facer que isto siga sendo posíbel. Moitas grazas rapaces, sen vós isto non sería o mesmo.

Tamén vos quero recordar que, na conferencia Axuda - Galego, tendes aberto o noso furancho, O Fogar de Breogán (42300.1), onde estades convidados todos a tomar algo e compartir lume e anécdotas. Os participantes da Galiza Cup teñen todo gratis, a ver se esperta un pouco a comunidade galega e comentamos como nos vai. Tamén vos recordo que temos alí o fío de LA-Galego (88747.1), onde poderedes comentar calquera aspecto sobre a nosa lingua no BB.

Participantes

Non nos imos pór estrictos agora, non? Coma sempre, para participar o único que fai falla é apuntarse. Non é necesario ser supporter, pois os encontros xóganse os xoves, o días dos amigábeis normais. Compre dicir que a lingua oficial da organización do torneo será o galego, polo tanto é recomendábel ter un bo coñecemento do galego para non ter problemas. Obviamente non faremos discriminacións, e se alguén precisa axuda, sempre poderá pedir que lle pasemos a información en castelán por privado.

Inscripcións

Para anotarse nesta edición da Galiza Cup, o único que tes que facer é dicilo neste fío. Non se admitirán inscripcións por BB-mail, xa que dá máis choio e habería que pórse a ordenar as inscripcións. Polo tanto, a única forma de inscribirse e dicíndoo neste fío, calquera outra forma non terá validez.

Prazo de Inscripción

O prazo de inscripción comeza xa mesmo e remata o día 18 deste mes, así que tedes unha semana para anotarvos... non o deixedes para o último momento!

Formato do Torneo

A duración total da Galiza Cup será de 8 semanas. Como xa sabedes, na primeira fase faranse grupos de catro equipos, ca posibilidade de chegar até un máximo de 8 grupos para dar cabida a tantos equipos como sexa posíbel.

Tamén permitídeme recordarvos que temos os 8 enchufados:

Para facer que ningún equipo quedase fóra da Galiza Cup por mor de seguir na Copa de España, creamos o concepto dos 8 enchufados. Estes 8 enchufados pasarán directamente á segunda fase da Galiza Cup, e así terán unha marxe de 3 semanas máis para caer da Copa. Os 8 enchufados serán escollidos da seguinte maneira:

1.- Os equipos que sigan na Copa, ordeados polas GCStats de maior a menor.
2.- Os equipos eliminados na Copa, ordeados polas GCStats de maior a menor.

Desta maneira, a Galiza Cup levaríase a cabo en tres etapas.

1ª Liguilla

Nesta primeira fase faríanse tantos grupos de catro equipos como sexa posíbel, até un máximo de 8 dependendo do número de participantes. Iso si, é condición indispensábel que os grupos estean completos, non poderiamos facer ningún grupo de 3 ou 2.

Destos grupos pasarán en total 8 equipos. Dependendo do número de grupos, poden pasar máis ou menos equipos por grupo. Se hai catro grupos, pasarían o primeiro e o segundo de cada grupo. En caso de que houbese máis de catro grupos, pasarán os primeiros de grupo, e os mellores segundos ata completar o número de prazas, é dicir, ata que sexan 8 equipos. En caso de que sexan oito grupos, tan só pasarán os primeiros de cada grupo.

En caso de empate, os criterios de desempate son os seguintes, por esta orde:

1.- Menor número de NP (non presentados).
2.- BasketAverage (se son 2 equipos, o particular do seu encontro, se son máis, o global do grupo, agás no caso de non presentados, no que se contaría o enfrontamento directo entre os equipos que teñen o mesmo número de non presentados).
3.- En caso de empate total, o desempate dependerá da organización.

O sorteo realizarase tomando "cabezas de serie", polas xa antes mencionadas GCStats.

2ª Liguilla

Practicamente idéntica á primeira, e é aquí cando se "acoplan" os 8 enchufados. Catro grupos de catro equipos. Cada grupo estará composto por dous equipos enchufados, e dous equipos clasificados da primeira liguilla, todo por riguroso sorteo ao que só asistirei eu e a miña cadela se ten sorte.

En caso de que algúns dos 8 enchufados seguise disputando a Copa de España, o seu lugar sería ocupado polos seguintes enchufados dispoñibles, e despois miraríanse os mellores clasificados da primeira liguilla, tendo en conta primeiro o número de vitorias, e despois o basketaverage global. Como sei ben de que estades feitos, por se dous ou máis equipos obtivesen exactamente os mesmos números, o equipo clasificado sairía dun sorteo feito pola organización.

Nesta 2ª Liguilla, só se clasificará o campeón, polo que o boleto para a fase final estará o dobre de caro.

En caso de empate, os criterios de desempate son os seguintes, por esta orde:

1.- Menor número de NP (non presentados).
2.- BasketAverage (se son 2 equipos, o particular do seu encontro, se son máis, o global do grupo, agás no caso de non presentados, no que se contaría o enfrontamento directo entre os equipos que teñen o mesmo número de non presentados).
3.- En caso de empate total, o desempate dependerá da organización.

O sorteo realizarase tomando "cabezas de serie", tomando en primeiro lugar ós enchufados por orde de GCStats e en segundo lugar os clasificados da primeira liguilla por orde de GCStats.

Final Four

Duas semifináis entre os catro campeóns dos grupos da segunda liguiña, unha vez máis decidindo os emparellamentos por sorteo. Só un encontro e os dous gañadores pasarán á desexada final. Cabe salientar que o factor campo será por sorteo, agás que os equipos xa se atopasen con anterioridade nas Final Four, entón xogarase no campo onde non se xogou a última vez.

Final

Debido á duración do torneo, a final ten que disputarse durante os PlayOff oficiais, polo que a data pode oscilar. Isto quere dicir que os dous finalistas terían que acordar unha data para xogar a final, xa que se un queda de 5º e outro xógase os descenso, non sería un encontro xusto. De tódolos xeitos a final sempre se podería xogar no derradeiro amigábel da tempada, cando os PlayOff xa rematasen.

Por outra banda, se os dous finalistas queren poderíase xogar ao mellor de tres encontros. Terase que falar no momento e ver o que máis lle convén aos dous equipos implicados.

Calendario

18/10 --> Peche da Inscripción e Sorteo da 1ª Liguilla
24/10 --> Primeiro encontro da 1ª Liguilla
31/10 --> Segundo encontro da 1ª Liguilla
7/11 --> Terceiro encontro da 1ª Liguilla
8/11 --> Sorteo da 2ª Liguilla
14/11 --> Primeiro encontro da 2ª Liguilla
21/11 --> Segundo encontro da 2ª Liguilla
28/11 --> Terceiro encontro da 2ª Liguilla
29/11 --> Sorteo da Final Four
5/12 --> Semifinais

Encontros

Os encontros, como xa saberedes, xogaranse os xoves, nos amigábeis. O equipo que figure como local será o encargado de retar, e o visitante deberá estar atento para aceptar o reto. O luns a mediodía a máis tardar, o reto terá que estar feito polo equipo local, e o martes ao mediodía deberá estar aceptado polo visitante. Se se incumplen as datas, se o equipo que está a agardar o solicita, o encontro lle será dado por gañado por 25 - 0 e poderá buscarse outro amigábel para non perder o adestramento. Tamén é posíbel que o que figura como visitante faga o reto, pero neste caso terá que facelo para xogar fóra da casa.

Responsabilidades nos Retos

No caso de que o reto non se peche correctamente, aquí vos deixo a mellor forma de actuar:

Se o teu rival se retrasa á hora de facer o reto, o mellor que podes facer é retalo ti e mandarlle un BB-mail avisándoo de que tendes encontro, que acepte canto antes. Isto vai tanto para locais como para visitantes. Se o problema persiste, é entón cando se recurre ao foro, ou aos organizadores, avisando do problema para que se tomen medidas.

Se o teu rival ten outro amigábel concertado, entón tes que avisar aos organizadores (polo foro ou BB-mail) canto antes do problema e agardar a súa resposta. Se a resposta dos organizadores tarda demasiado, bastará cun post no fío e xa poderás buscar outro amigábel para non perder o adestramento.

Agradecemos sempre que se deixe unha marxe de cortesía, xa que o rival puido ter problemas para conectarse. As cotas están para ter tempo suficiente de reacción, pero realmente o amigábel pódese concertar ata a tarde do mércores, polo que o risco de perder o adestramento é pequeno. Sempre que se poida é de agradecer que agardedes máis polos vosos rivais!

Se ningún dos dous equipos informa dos problemas, é posible que se dea o encontro por perdido a ámbolos dous equipos.

Premio

Seguimos arrasando co agasallo, desta volta repetimos o premio habitual:

Pase VIP para o Fogar de Breogán (42300.1), que inclúe:

- Reservado ó carón do lume
- Barra libre para toda a vida!
- Tapas gratis para toda a vida!

Polo de agora Miki_zar por cinco veces, Onire por tres veces, Alexenko, Sozap86 e Miqe por dúas, Litur, Pepe Beltrán, Matxone, Anemal, Cruiss, Barato e Sapoconcho acadaron o seu oco na historia dos equipos galegos... Serás ti o seguinte???

Benvidos a esta XXII Galiza Cup. Sentídevos coma na casa e pasade un bo anaco con nós. Se alguén ten algunha dúbida, suxestión ou queixa, pode dicilo neste mesmo fío ou, se o prefires, por BB-mail a min.

Benvidos!!!

Historia da Galiza Cup

Xa imos acumulando bastantes edicións, e as primeiras edicións xa se ven con certa lonxanía, pero no noso arquivo non se perde nada ;).

---

Primeira edición

Xa case con nostalxia podemos ollar o primeiro fío da Galiza Cup (13967.1). Mensaxe que por certo comeza cunha petición de desculpas porque daquela non se podía falar galego nos foros... Que cabreo collera...

Unha primeira edición que foi montada un pouco sobre a marcha, pero que ao final saíu bastante ben, a única pega que tivo é que quedou bastante xente fora... Unha mágoa. Afortunadamente agora xa comezamos co formato definido, e temos a experiencia destas edicións na organización, que nos axuda a evitar erros.

Campión --> Litur – Chorima Basket – (75749)
Subcampión --> Alexenko – Universidad de Cambre – (75746)
Final --> (3997474)

---

Segunda edición

Esta segunda edición xa foi bastante máis doada dende a organización, primeiro pola experiencia adquirida na primeira edición, e segundo pola colaboración na organización que prestou Litur. Se ve que lle colleu apego á Galiza Cup que non se puido librar dela. Tamén temos no arquivo o enlace ao fío, (31544.1)

Edición que ampliou un chisco máis o formato, pero inda así insuficiente. Foi outro erro máis para o saco da experiencia. Tamén foi a edición na que se implantou o método dos enchufados.

Campión --> Pepe Beltrán - Jericho B.C. – (75692)
Subcampión --> Kelepol – Celtics de Coia – (76267)
Final --> (6230309)

I Cunca dos Labregos

En paralelo a segunda edición da Galiza Cup, naceu esta outra competición coa idea inicial de dar cabida a aqueles equipos que non tiveron sitio na GC. Nesta primiera participación formáronse dous grupos de catro equipos que loitaron por convertirse nos primeiros en levarse o trofeo.

Campión --> Onire - Corrichos - (79103)
Subcampión --> cruiss - C.B. Skalda - (42876)
Final --> (6054980)

---

Terceira edición

Esta edición pasará á historia da Galiza Cup por ser a edición dos comités. E é que foron moitos os encontros que deron problemas, e en cada un deles houbo unha investigación e unha resolución. Á marxe dos problemas no peche dalgúns encontros, hai que salientar que de novo nesta edición se ampliou o formato, ata un total de 40 equipos participantes, incluíndo os 8 enchufados. Tamen hai que salientar a colaboración impagábel de Litur. Como non, conservamos o enlace ao fío, (45869.1).

Campión --> Matxone - Juanito Caminante - (76841)
Subcampión --> Kelepol - Celtics de Coia - (76267)
Final --> (8249241)

II Cunca dos Labregos

De novo se leva a cabo a Cunca dos Labregos, dando entrada, nesta ocasión, aos mellores equipos que quedaron fora da primeira fase da GC e aos equipos que non puideron entrar dos que todavía estaban xogando a Copa. A final por un despiste tivo que xogarse na temporada seguinte.

Campión --> Natx0 - Celta de Vigo - (77726)
Subcampión --> -noel- - Chikichikies - (76872)
Final --> (10363766)

---

Cuarta edición

A cuarta edición da Galiza Cup cheira a estabilidade. Por primeira vez non se tocou o formato (para algo que nos funciona ben!), nin houbo moito choio para o comité... Ains... Que tranquilidade. A Galiza Cup xa comeza a coller ese cariz familiar e fogareño que tanto nos gusta. Unha vez máis, Litur de "chapeaux". Tamén se podería salientar o primeiro intento de incorporar a Galiza Cup nunha "Supercopa de España" que ao final non se levou a cabo. Gardamos o enlace no arquivo, por se algún nostálxico quere repasar aqueles días de gloria (59976.1).

Campión --> Onire - Corrichos - (79103)
Subcampión --> Miki_zar - Chacaritas Team- (76515)
Final --> (10652380)

III Cunca dos Labregos

Seguindo a mesma liña que na segunda edición, de novo 16 equipos buscaron levarse o trofeo cara as súas vitrinas. De novo moita emoción entre aqueles equipos que non puideron seguir adiante na GC.

Campión --> Mjorgan - Garfunkel - (76866)
Subcampión --> jpergom - Diplococo Team - (26057)
Final --> (10648338)

---

Quinta edición

Edición que voltou ca tradición de facer trocos. Para non perder as boas costumes, introducimos unha pequena modificación no modo de facer os desempates, para facelos máis xustos. Á marxe diso, foi unha edición que transcorreu con bastante tranquilidade, e case que o máis salientábel foi que por primeira vez na Galiza Cup unha final repetiuse, e non foi outra que a que enfrentou ós dous organizadores. Salientar tamén a ausencia da Cunca esta tempada pola paternidade de Litur. Como non, dispoñemos do fío no noso arquivo para quen desexe consultalo (80077.1).

Campión --> Alexenko – Universidad de Cambre – (75746)
Subcampión --> Litur – Chorima Basket – (75749)
Final --> (13048991)

---

Sexta edición

Nova edición da Galiza Cup, desta volta xa sen trocos. Ó fin e ó cabo, os erros van levando a solucións, e o xa se vai acadando unha rutina moi tranquila para o torneo. Primeira edición na que se repite campeón, o primeiro en acadar o segundo trofeo. Por outra banda salientar a volta da Cunca de mans de Litur, que xa pasados os primeiros meses da súa paternidade, voltou a organizar un torneo que xa ten vida e historia propia. No noso arquivo persoal tamén gardamos a ligazón da sexta edición (98064.1)

Campión --> Onire - Corrichos - (79103)
Subcampión --> Giovanella - Irmandades da Fala NG - (78047)
Final --> (15470149)

IV Cunca dos Labregos

Tras un ano de ausencia, voltou a Cunca dos Labregos, repetindo o formato da III edición, e dicir, 16 equipos saidos de entre os que non puideron entrar na GC e os mellores conxuntos dos 18 eliminados da primeira fase. Está claro que con cada edición a Cunca toma mais prestixio xa que a emoción e a loita por levarse o título é cada vez mais encarnizada.

Campión --> Trapall - Entreleiras - (79266)
Subcampión --> Jpergom - Diplococo Team - (26057)
Final --> (15463325)

---

Séptima edición

Nova edición con aires de familiaridade, tan familiar coma a axuda de Litur na organización. Se cadra o máis salientábel son os poucos problemas que houbo cos encontros que non se concertaron e que non chegou á Final Four ningún dos equipos que xa tiñan un trofeo da GC. Salientar tamén que non quedou ningún equipo inscrito fóra, agás os enchufados que duraron de máis na Copa, polo que non foi necesaria a organización da Cunca dos Labregos. E de paso engadimos outro fío máis ó noso arquivo persoal (113475.1)

Campión --> Miki_zar - Chacaritas Team - (76515)
Subcampión --> Giovanella - Irmandades da Fala NG - (78047)
Final --> (17912863)

---

Oitava edición

Edición na que cabe destacar a incorporación de Miki_zar á familia dos organizadores da Galiza Cup. Outra edición con poucos problemas nos retos, grazas en parte á boa labor de Miki ó encargarse dos retos que non marchaban. No deportivo salientar que chegaron á final os mesmos equipos ca tempada pasada, e a primeira incomparecencia a unha final, o que mermou un pouco o espectáculo do torneo. Tamén salientar que é a primeira vez que un equipo gaña dous torneos consecutivos. Xa postos arquivamos tamén na nosa biblioteca o fío da edición (125647.1).

Campión --> Miki_zar - Chacaritas Team - (76515)
Subcampión --> Giovanella - Irmandades da Fala NG – (78047)

---

Novena edición

Sen dúbida a edición con menos problemas para a organización. Tan só un encontro o que non se disputou do total dos encontros da Galiza Cup, cortesía de Giovanella (a ovella negra da GC). Un record que sen dúbida tentaremos superar, e conseguir unha edición na que se xoguen tódolos encontros. Tamén destacábel un pequeno troco no formato, que afecta ó factor campo na Final Four. No apartado deportivo salientar un nome propio: Miki_zar. O bo de Miki non só se convertiu no encargado de ollar que os retos se cumplan, se non que se convertiu no primeiro equipo en gañar tres edicións da Galiza Cup, ademais de xeito consecutivo. De novo gardamos na nosa memoria o fío da edición (139413.1).

Campión --> Miki_zar - Chacaritas Team - (76515)
Subcampión --> Alexenko – Universidad de Cambre – (75746)
Final --> (22975496)

---

Décima edición

Décima edición da Galiza Cup, na que tivemos un completo repado de case tódolos clásicos que acompañan a nosa competición. Dende o xa habitual pequeno troco nas regras, que desta volta foi un simple apunte nas regras de desempate, até un novo campionato para Chacaritas Team, pasando polas típicas investigacións nos encontros non pechados. Máis alá diso, unha décima edición que de novo gañou Miki_zar, que a este paso terá que ampliar o seu pavillón, ou máis ben a sala de trofeos. Para non perder nada, engadimos á nosa libraría persoal o vencello cara o fío desa edición (152410.1)

Campión --> Miki_zar - Chacaritas Team - (76515)
Subcampión --> DunklerGeier – Ourense Bulls – (76363)
Final --> (26087904)

---

Undécima edición

Edición salientábel por dúas cousas e media. A primeira e que agás a apertura do torneo, toda a organización correu a cargo de Litur e Miki_zar, e como non podía ser doutro modo, todo saiu a pedir de boca. A segunda novidade é que non gañou Chacaritas o seu quinto torneo consecutivo, que xa ía sendo hora de que o botasemos de aí. A outra media novidade é que a falta de que o gañase o máis abusón, o gañou o segundo máis abusón, e así Onire acadou a súa terceira Galiza Cup. E como xa non pode ser doutro xeito, gardamos tamén o vencello da edición no noso arquivo: (160490.1)

Campión --> Onire - Corrichos - (79103)
Subcampión --> Alexenko – Universidad de Cambre – (75746)
Final --> (29177118)

---

Duodécima edición

Poucas novidades na decimosegunda edición. Desta volta a organización foi compartida entre os tres de sempre, na primeira rolda o peso recaeu sobre Miki_zar e Litur, namentres que nas fases máis avanzadas Alexenko retomou a organización. Por outra banda a Galiza Cup tampouco acabou nas vitrinas de Chacaritas nin Onire, así que ningún dos abusóns oficiais da competición engrosou o seu palmarés. O que si se estreou foi Bergondo Sperm Whales, que xa está dentro do selecto grupo de gañadores dunha Galiza Cup. No arquivo gardamos tamén, como cada tempada, o vencello da XII edición da Galiza Cup (173248.1)

Campión --> Sozap86 - Bergondo Sperm Whales - (78493)
Subcampión --> Sapoconcho – Cans de Palleiro – (80236)
Final --> (32837614)

---

Decimoterceira edición

O retorno de rei. E si, xa tardaba pero ó final Miki acadou o seu quinto anel de campión. De novo organización compartida, cunha excelentísima labor de Miki e Litur na primeira rolda e a parte final levada por min. Outra novidade salientábel é que por primeira vez a Galiza Cup xogouse con retraso, dúas semanas concretamente. Por sorte houbo marxe abondo para xogar cada rolda sen compricacións. Coma sempre, no noso arquivo gardamos todos e cada uno dos fíos, e este non ía ser menos: (184496.1)

Campión --> Miki_zar - Chacaritas Team - (76515)
Subcampión --> Cruiss – C.B. Skalda – (42876)
Final --> (36152653)

---

Decimocuarta edición

Outra edición, e afortunadamente librámonos de Miki. E é que xa cando facemos o resumo do que foi a edición da Galiza Cup, sempre hai unha mención especial para Miki, que polo bo ou polo malo sempre é nova para nós. Pero el ben sabe que por aquí o queremos moito e que ten aquí o seu fogar. Cabe destacar que a nosa Raíña ten un novo campeón: Miqe. Unha andaina abraiante por toda a edición para coroarse como lexítimo campión, telo merecido. Por outra banda, tamén hai que salientar o subcampionato de Giovanella, e coido que con esta xa van 5. Por suposto, un vencello máis que engadimos o noso arquivo: (194239.1)

Campión --> Miqe - The Monty Python´s Flying Circus - (79961)
Subcampión --> Giovanella - Irmandades da Fala NG - (78047)
Final --> (39448209)

---

Decimoquinta edición

Quince edicións, que rápido se di. E nestes xa máis de tres anos todo o que compartimos. Sen dúbida, mereceu, merece e merecerá seguir traballando para que isto poida continuar. Nesta edición cabe salientar unha cagada máis do organizador, Alexenko, que trabucouse nas contas na fase de grupos e deixou a un equipo clasificado fóra da segunda liguilla, polo que lle cedeu o seu lugar. Tamén salientábel a axuda recibida por parte de sozap86 (78493), un xa veterán da competición que se encargou da clasificación da segunda liguilla. Mil grazas pola axuda. E como non, xa que á Raíña non lle gusta repetir, e menos dende o abuso de Miki, un novo campión, Anemal, que se leva un trofeo máis que merecido. Engadimos un vencello máis o noso arquivo persoal: (203005.1)

Campión --> Anemal - Los Brincos - (78354)
Subcampión --> Miqe - The Monty Python´s Flying Circus - (79961)
Final --> (42748780)

---

Decimosexta edición

E na decimosexta edición apareceu un vello veterán da competición para gañar o trofeo. Cruiss, e o seu CB Skalda, voltan para México co seu primeiro trofeo. Un éxito celebrado como merecía por parte dos seareiros do club. E non foi sen sufrimento, porque era o segundo equipo con máis GCStats sen un trofeo, e despois de tantas tempadas por fin o acadou. Tamén cabe salientar que tivemos unha nova incorporación na organización. Sozap, que xa comenzara a colaborar con nós na pasada edición de forma esporádica, incorporouse oficialmente ó equipo de organizadores. Benvido langrán ;). Outro vencello máis para o noso arquivo: (211754.1).

Campión --> Cruiss - CB Skalda - (42876)
Subcampión --> Anemal - Los Brincos - (78354)
Final --> (45636570)

---

Decimoséptima edición
Última edición en minoría de idade do máis prestixioso torneo de BB. E como xa estamos afeitos, un novo campión acadou o trofeo. Os Famentos de Barato arrasaron ca despensa para facerse co seu primeiro título da Galiza Cup, que a ben seguro festexouse por todo o alto na sede do club. Mención especial tamén para Miki zar, outro que non dá tregua e segue acumulando fináis. Outra edición máis non podo deixar de dar as grazas os langráns que cargan comigo na organización. Xa sabedes que agardo a vosa dimisión. Engadimos tamén o vencello no arquivo, (219397.1).

Campión --> Barato - Os Famentos - (78658)
Subcampión --> Miki_zar - Chacaritas Team - (76515)
Final --> (48950968)

---

Decimooitava edición
Primeira edición en maioría de idade do máis prestixioso torneo de BB. Grazas a un terrible amaño dos sorteos, dos grupos e até do propio motor do xogo, lamento comunicar que nesta edición volveu gañar o peor langrán que hai polo torneo, o organizador Alexenko. Iso si, hai que admitir que desta volta disimulou ben porque foi Sozap o que se encargou de realizar os sorteos da Final Four para que non parecese que había gato encerrado... meus pobres, inda cren que vou deixar que o azar me xogue malas pasadas. Unha tempada máis engadimos o vencello da edición a nosa lista (227057.1).

Campión --> Alexenko - Universidad de Cambre - (75746)
Subcampión --> KiSpMc - Federación - (78420)
Final --> (52644869)

---

Decimonovena edición
Pois parece que ó paso da maioría de idade sentoulle mal á nosa raíña, que por un lapso na organización comezou a sua andaina unha semana tarde. Máis alá diso, unha nova edición ca impagábel colaboración dos tres panocos de sempre, sen os cais a Galiza Cup non sería nin a metade do que é. Grazas de novo a Litur, Miki_Zar e Sozap, este último xa un fixo facendo as clasificacións e sorteos. Tanto aprendeu de min, que agora amaña os sorteos para saír favorecido... e que ben lle vai. Nin máis nin menos que campión da Galiza Cup. Se é que xa non hai vergonza por ningures. Mención salientábel tamén para pepevazquez que estivo moi preto de levanta-lo seu primeiro título. Un vencello máis para o noso arquivo (233811.1)

Campión --> Sozap86 - Bergondo Sperm Whales - (78493)
Subcampión --> Pepevazquez01 - Ourense Basket - (79922)
Final --> (55947623)

---

Vixésima edición
Edición cargada de sorpresas, inda que a maioría fosen non propiamente no torneo. O primeiro é salientar que un novo adestrador se une ó grupo de gañadores da Galiza Cup. Por fin Sapoconcho acadou a súa primeira Galiza Cup, parabéns! Tamén felicitar a un vello coñecido como Miqe, digno finalista. En segundo lugar, salientar que por fin se xogou a final da oitava edición entre Chacaritas e Irmandades da Fala. Desgraciadamente non saltou a sorpresa e Miki revalidou o torneo que gañara no seu día pola incomparecencia de Giovanella, que se despide do xogo. Aquí vos queda o vencello ó encontro: (59237677). E por último, salientar que por fin se fixo a primeira xuntanza da Galiza Cup. Litur, sozap, Foto e Alexenko desfrutaron dun bo xantar no Fogar do Santiso, compartindo anécdotas de baneos dos ex-GM e amaños de encontros dos organizadores da GC, sen dúbida unha experiencia a repetir. Mágoa que non puidese vir Miki, que tivo un percance co coche de última hora e non puido asistir. Coma sempre, o vencello para que teña interese en investigar os amaños da edición (239953.1)

Campión --> Sapoconcho - Cans de Palleiro - (80236)
Subcampión --> Miqe - The Monty Python´s Flying Circus - (79961)
Final --> (59247390)

---

Vixésimoprimeira edición

Outra tempada que remata, outra Galiza Cup que atopa un gañador. Desta volta foi Miqe o que gozará da compaña da nosa raíña durante unha tempada, conseguindo así a súa segunda Galiza Cup, despois de auqe a tempada pasada caese na final. O meritorio finalista foi Pepevazquez, que de novo caeu na final. Como siga así non vai haber quen lle quite o seu trofeo. E por último salientar que por retrasos que xa veñen sendo habituais, o torneo comezou cunha semana de tardanza. Pero desta volta non foi por mor da organización, foros os participantes os que chegaron tarde á inscripción e houbo que retrasar o comezo unha semana, así que desta volta será a organización a que pida a dimisión dos participantes. E, para non perder as boas costumes, deixamos o vencello para os que algún día teñan morriña da edición (245044.1)

Campión --> Miqe - The Monty Python´s Flying Circus - (79961)
Subcampión

Last edited by Alexenko at 10/11/2013 2:06:39 PM

Clasificación Histórica de Galiza Cup Stats

1 miki_zar Chacaritas Team 1101
2 LA-Alexenko Universidad de Cambre 1087
3 Oyagun Ktulu 1004
4 LA-Litur Chorima Basket 987
5 Onire Corrichos 969
6 Sozap86 Bergondo Sperm Whales 955
7 Giovanella Irmandades da fala NG 859
8 Sapoconcho Cans de Palleiro 746
9 cruiss C.B. Skalda 740
10 Mige Monty Phyton 714
11 DevillX Raxo City 685
12 Famento Os Famentos 497
13 DunklerGeier Ourense Bulls 491
14 Freitas Mexilons da Ría 489
15 KiSpMc Federación 475
16 kelepol Celtics de Coia 468
17 Feedback Panetones do Caralho 431
18 Danilo1 Lacón con Grelos 413
19 Trapall Entreleiras 390
20 Anemal Los Brincos 362
21 Vartokomus Lostrego Coiense BT 343
22 Pepevazquez01 Ourense Basket 339
23 Jpergom Diplococo Team 328
24 Souto Galiza Celtics 324
25 Delta 10 Illas Cies 318
26 Misma Dreamer Teamer 276
27 kotxunaitis La Kinder del kotxudo 264
28 Alex Lamela C.B. Todoporelaro 255
29 Belen C. Basket Genius 251
30 Sweet Devesa Celtics 237
31 david campos Breogan 226
32 Matxone Juanito Caminante 224
33 Xosesinho Tropa do Carallo 212
34 Ivanff Forza Breo 198
35 Jorg Garkunkel/Centolas Asasinas 196
36 Xoanp Xubia basket/Cacique Tean 196
37 OReiDasCanastas Labazadas in Your Face S.A. 179
38 Tonhocid Viña Costeira 173
39 Aspas11 Charlotte Vodkas 172
40 GZ-xexu Maure Team 170
41 Diebro Lavacolla B.C 166
42 Platanito21 Escairón 164
43 Josevicius Penasteam 159
44 Kako5 Dena City 158
45 albarello-lnc Touland Trail Blazers 157
46 Traska Coiotes 156
47 Noel Chikichikies/Extreme Kings 154
48 Campesino Lugoplastica 144
49 Karakol C.B. Gran Pena 143
50 Cazador St. Gallen Club 139
51 El facass CB Muradan 132
52 Milosevic Os Millo Lakers 126
53 jd-elrile Coruña Polards 119
54 Natx0 Celta de Vigo/Vigo Celtics 116
55 Shanty C.B. Sotonera 112
56 Hamlet29 Gallegos Medievais 111
57 Pepe Beltrán Jericho B.C 110
58 Lafita99 Los putos amos 94
59 Martinez Calvario Mavericks 93
60 El Santo Cascarilleiros 93
61 JRTalín Vento do Nordés 88
62 Afarensis Ferrol Destroyers 86
63 Gincho Becerros de Campos 84
64 Jacks CP3 82
65 Bacilolactico Bacilo´s Team 74
66 An Pensado Pontepedriña 73
67 Davidcruz Armadillos S.A. 69
68 Coxx Dubert C.B. 68
69 Carracillo Carracillo 64
70 Sete stars Stas ke si 63
71 Saimon12 R.C. Deportivo 63
72 Deluxe Victoria Deluxe 60
73 elcadro Tojuplastica 58
74 Madmartigan C.B. Duncan 58
75 Boqueixón Independence Day 58

76 Triple T Barqueiro C.B. 49
77 Maripakis Korunha Basket 46
78 Marco605_ Atletico Peluso 2007 45
79 Crrremas Rastapastovic 43
80 Trozo Serres C.B. 42
81 realinho Barqueiro Showtimes C.B. 41
82 Henricovic PioXII CB 36
83 Johnson Waltercio Johnson's Five 31
84 Rikiller New Cambre Hornets 31
85 Zurzinho Cedeira Trail Blazers 29
86 Vlado_Gudelj Bandulhos B.C 28
87 CastelaoGZ CastelaoGZ 27
88 Michi84 Los Mantas 27
89 AndeFente Brozas C.B. 27
90 Outeiro Berenguela 26
91 nandotas77 Mesoiro Basket 26
92 Muleiro Celta Corcores 26
93 FleaDX Funky Peppers 26
94 Frikiman Cangas 26
95 Elfeca Coruña Hércules 26
96 Javirigoyen Piri B.C. 26
97 Cernicalo89 Chantada Octopus 24
98 Frikimordor Axa Winterthur Treboada 20
99 El ingeniero Los Tanques 20
100 Arenazero AnubiS 15
101 SergioMuradan O´Nogal Basket Club 15
102 Solomeo CB Ourense 15
103 Os fumetas de lars Pequeno lars 14
104 Racso Burgas Basket 14
105 Luigidac Tucson C.B. 8
106 jaime69 Xanita Basket 5
107 garrido Orense Heat 5
108 chamallex Castreloswolf Changas 5
109 dieginho_7 C.B. Vila de Meira 5
110 candaira L.A. Chaikers 5
111 breogan LeiteRíoBreogan 5
112 deivy_57 Leite Ron Breogan 5
113 toninho Celta Vigo Urban 5
114 kikeiglesias ¡¡ Viva el Rey !! 5
115 MrMac C.B. Rabadense 5
116 jako0b0 Liberation 2
117 C.B. Lobelle Markosevic -10
118 Cuervos negros Roiko -10
119 Elx Baloncesto Ilicitano -10
120 Gaxego Teamer Dreamer -10
121 Springüich Joshuas Team -10
122 Nazareno Pulpo a galega -10

Last edited by Alexenko at 10/27/2013 2:20:43 PM

Galiza Cup Stats

De seguido teredes unha lista ca cantidade de Galiza Cup Stats que se obteñen por cada logro!

Inscribirse ----------------------------------------------> 20
Enchufados que seguen na Copa -------------------> 15
Non Retar ----------------------------------------------> -10
Non Aceptar o Reto -----------------------------------> -10
Partido Gañado na 1ª Liguilla -------------------------> 3
Partido Perdido na 1ª Liguilla -------------------------> 2
Clasificarse Liguilla como 1º ---------------------------> 6
Clasificarse Liguilla como 2º ---------------------------> 4
Partido Gañado na 2ª Liguilla -------------------------> 5
Partido Perdido na 2ª Liguilla -------------------------> 3
Clasificarse Liguilla como 2º ---------------------------> 10
Semifinalista da GC ------------------------------------> 25
Subcampión da GC ------------------------------------> 35
Campión da GC -----------------------------------------> 50

Apúntome unha vez máis¡